ILOILO CITY – Liwat nga ginduso sa Iloilo City Council ang pag-amyendar sang Regulation Ordinance 2011-307 ukon ang Closed Circuit Television ordinance sa syudad sang Iloilo.
Sa interview sang Bombo Radyo kay Iloilo City Councilor Miguel Treñas, proponent sang ordinansa, iya ginpahayag nga dapat nga i-revisit ang ordinansa bangud nga madamo sa gihapon sang wala naga-comply ilabi na nga madamo man sang mga insidente nga nagakatabo.
Dugang pa niya, dapat nga ang tanan nga mga business kag commercial complexes, establishments kag iban pa nga high-risk places ang may yara sang naka-install nga high definition nga closed circuit television.
Pahayag dugang sang natungdan, kun may yara man sang closed circuit television ang isa ka establishment, napanas na ang video ukon indi man manami ang kalidad gani indi man mapuslan.
Natalana man nga ipatawag ni Treñas upod sang Committee on Police, Public Safety, Order & Security ang mga tag-iya sang mga establishments.
Sang 2020, ginduso man ni Iloilo City Councilor Ely Estante ang pag-amyendar sang ordinansa.
