Iloilo City – Ginkasubo sang Iloilo City Police Office ang nangin resulta sang ginpatigayon nga drug buy-bust operation sa Barangay Lanit, Jaro, Iloilo City kun sa diin gintunaan sang kamatayon sang durugista.
Ang napatay amo si Jason Espaltero alias “Don- Don”, 32, tumandok sang San Jose, Antique kag temporaryo nga naga-istar sa Barangay Rizal-Estanzuela, Iloilo City Proper.
Sa interview sang Bombo Radyo kay Police Lieutenant Colonel Antonio Benitez Jr., Chief sang Iloilo City Drugs Enforcement Unit, iya ginpahayag nga wala sini gin-ekspektar ang gindangatan sang operasyon.
Suno kay Benitez, nag-depensa lamang ang mga kapulisan matapos nagbato kag una nga nagpalupok si Espaltero.
Nahibaluan nga nag-angkon sang igo sa dughan si Espaltero nga rason sang iya kamatayon.
Narekober sa possession ni Espaltero ang isa ka .45 caliber pistol amo man ang 110 grams sang suspected shabu nga may standard drug price nga Php748,000, kag P75,000 nga balor sang drug buy-bust money.
