Ginpasiguro sang Iloilo City Drug Enforcement Unit (CDEU) nga ginasunod nila sang pagpasaka sang kaso ang mga drug personalities nga madakpan lakip na ang pagpangsunog sang mga iligal nga druga nga makumpiskar sa ila.
Sa interview sang Bombo Radyo kay Police Captain Ryan Christ Inot, Head sang City Drug Enforcement Unit, iya ginpahayag nga may 36 hours agud nga mapasakaan sang kaso ang mga subject nga madakpan kag kon indi mapasakaan kag maglampas sa nasambit nga oras, mahimo sila makaguwa.
Samtang, ang mga recoveries naman nga iligal nga druga ang gina-surrender sa crime lab, kag ang crime lab ang magapresentar sa korte, samtang ang korte naman ang nagamando sa pagsunog sini paagi sa omnibus order.
Suno kay Inot, ang pinakaulihi nga bahin sang proseso amo ang disposal nga ginapangunahan sang Philippine Drug Enforcement Agency (PDEA).
Gintuad man sini nga sugod Enero subong nga tuig, may masobra 20 na ka mga drug personalities ang napasakaan sang kaso sang talatapan.
