Ginahimuan na sang tikang sang City Drug Enforcement Unit (CDEU), natuhoy sa natukiban nga P816 million nga balor sang droga sa Oriental Mindoro nga pagadal-on kuntani sa Iloilo City.
Sa interview sang Bombo Radyo Iloilo kay Police Captain Christ Inot, iya ginpahayag nga ginadayaw niya ang pagdakop sang otoridad kay alyas Christopher, nga amo ang driver sang salakyan nga may karga nga iligal nga druga.
Ini kasunod sang ginpatuman nga check point sang otoridad.
Dugang pa ni Inot, tuman gid kadako ang bulig sa syudad ang pagtapna kay alyas Christopher sa pagdala kuntani sang iligal nga droga sa syudad.
Suno pa sa natungdan, mas mabudlay sa parte sang mga kapulisan kun natigayon nga madala diri sa syudad ang droga.
Ginpahayag man sini nga madamo pa sang i-monitor ang talatapan bangod mahimo indi lamang ini mahatag sa isa ka tawo kag posible nga maglapta pa sa Iloilo.
Nahibaluan man nga nag-gwa ang pangalan ni alyas Christopher bilang isa ka carrier sang droga kag madasig lang ini siya maka-transport bangod isa man siya ka truck driver.
