Nagpaathag ang City Drug Enforcement Unit (CDEU) nga indi maangot sa ila drug buy-bust operation sang nagligad nga adlaw ang napulot nga illegal drugs sang street sweeper sa Jalandoni St., Barangay Our Lady of Fatima, Jaro, Iloilo City.
Sa interview sang Bombo Radyo kay Police Lieutenant Jolie John Bandojo, Team Leader sang City Drug Enforcement Unit, iya ginpaghayag nga tuman ka layo ang lugar kon sa diin napulot ang sachets sang illegal drugs, kon sa diin, yara sa 25 metros ang distansya sini halin sa buy-bust area.
Suno kay Bandojo, kon parte sang ila nga operasyon ang amo nga sachets sang shabu, kontani sang Byernes pa lang nakit-an na ini.
Ini kasunod man sang sila ang nagpatigayon sang buy-bust operation sa sang Huwebes nga adlaw, Septyembre 5, 2024.
Ginpahayag man sini nga adlaw-adlaw may street sweeper nga nagapaninlo sa amo nga lugar kag mahimo ini gilayon nga makita.
Ginalantaw man sang natungdan nga posible may nagpatigayon sang transakyon sa amo nga lugar antes paman ini nakit-an.
Posible naman nga nawigit ini apang wala man ginadula ang posibilidad nga hungod ini nga ginhaboy.
