Nagpaathag ang Iloilo City Disaster Risk Reduction Management Office (CDRRMO) sa publiko kon ngaa hapon na nga nadesisyonan nga ikasenlar ang klase sa syudad kasunod man sang malain nga tyempo.
Sa interview sang Bombo Radyo kay Darwin Joemil Papa, Division Head sang Disaster Response Division-CDRRMO, iya ginpahayag nga ang dako nga volume sang ulan ang magatupa sa Iloilo City sugod alas-4:00 tubtob alas-5:00 subong nga hapon.
Suno kay Papa, ang nasambit oras ang peak sang rush hour sa syudad kon sa diin, halos sa mga mamumugon ang nagapauli sa ila puluy-an.
Gin-athag man sini nga ang nasambit nga mga rason man ang natulod sa talatapan agud nga ibutang ang kanselasyon sang klase hapon.
Ginpahayag man sang natungdan nga ginalantaw sang talatapan nga kon indi pagkanselahon ang klase, posible indi makapauli ang mga estudyante bangud man sa mabaskog nga pagbubo sang ulan.
Ginpatpat man ni Papa nga posible man makatuga sang pagpugok sang trapiko ang gulpiyada nga pagtipon sang tubig-baha sa dalan.
Nagpanugyan man ini sang mga residente nga nagapuyo malapit sa mga creek nga mangin alerto bangud mas dako ang posibilidad nga mas madasig nga magsaka ang tubig-baha sa amo nga lugar.
