Magapatigayon sang emergency session ang Iloilo City Council agud maaprubahan ang pondo halin sa Quick Response Fund (QRF) nga magamit para maka-recover sa epekto ni Bagyo Tino kag bilang preparasyon man sa mangin epekto ni Bagyo Uwan.
Kasunod ini sang meeting nga ginpatigayon sang City Disaster Risk Reduction and Management Council (CDRRMC) subong nga adlaw, Nobyembre 7.
Suno kay Joy Fantilaga-Gorzal, spokesperson ni Mayor Raisa Treñas, lakip sa gin-rekomendar sang council amo nga hatagan sang P10,000 nga balor sang shelter materials ang mga tag-iya sang totally damaged ukon nawasak nga mga balay.
Sa pihak nga bahin, P5,000 naman ang balor sang shelter materials para sa mga nagapanag-iya sang partially damaged nga mga balay.
Sa latest record sang Iloilo City Operations Center, masobra sa 1,600 ang nagkalaguba nga balay sa syudad sang naglaslas si Bagyo Tino nga may dala nga makusog nga hangin.
Ginbatak ang Signal No. 4 sa syudad sang kasagsagan sang paglaslas sang amo nga bagyo, kag isa man ang Iloilo City sa mga lugar kun sa diin ini nag-landfall antes ini nag-diretso sa Palawan area.
Magluwas sa pondo para sa restoration, may ipain man halin sa QRF para sa pagpanghanda para sa Bagyo Uwan nga gina-forecast man sang weather bureau nga magadala sang pag-ulan ukon baha sa Visayas.
Lakip sa gina-rekomendar amo ang pag-preposition na sang food kag non-food items para sa mga pumuluyo pananglitan ipatuman na ang mandatory preemptive evacuation.
Naka-full alert na subong ang CDRRMC kag naumpisahan naman ang pag-repack sang mga food supply para sa madasig nga deployment kun mag-umpisa na ang relief operations.
Matandaan nga may ginpaguwa man nga order ang Regional DRRMC kaina nga nagamandu sa DRRMCs sa Western Visayas nga magpatigayon sang preemptive evacuation sa mga pumuluyo sa high-risk areas bangud sang posible halit nga dal-on ni Uwan nga ginalantaw maga-develop pa sa Super Typhoon.
