ILOILO CITY – Wala pa sang recorded incident ang City Disaster Risk Reduction and Managament Office may kaangtanan sa halit nga tuga sang Bagyo Tisoy sa syudad sang Iloilo.
Sa interview sang Bombo Radyo kay Iloilo City Mayor Jerry Treñas, iya ginpahayag nga padayon ang monitoring sa lakat sang panahon kun sa diin nalakip ang syudad sang Iloilo sa mga lugar nga yara sa storm warning signal no. 1.
Suno kay Treñas, kun tani, indi na magbubo ang mabaskog nga ulan agud nga indi maapektuhan ang mga naga-istar sa high risk barangay ilabi na sa flood prone areas.
Ginpahayag ni Treñas nga naka-alerto sa gihapon ang emergency operation center samtang wala pa nakahalin sa Philippine Area of Responsibility ang bagyo.
Samtang, gin-athag naman ni Treñas nga gamiton sa gihapon ang bag-o lang ginkay-o nga Ortiz Wharf.
Ini ang kasunod sang reklamo sang mga taga Brgy. Ortiz nga sa Parola wharf na lang magadungka ang tanan nga pump boat nga nagabiyahe Iloilo-Guimaras vice versa.
Suno kay Treñas, magabalik sa Ortiz wharf ang mga pump boat nga may byahe Iloilo-Jordan apang mahimo nga madugayan pa ilabi na subong nga may yara pa sang bagyo.
Ginpahayag ni Treñas nga iya pa nga pabutangan sang uluyatan ang hagdan para sa mga pasahero nga senior citizen.
