CEBU – Nag-resign na si Cebu Governor Gwendolyn Garcia bilang myembro sang Partido Demokratiko Pilipino–Lakas ng Bayan (PDP–Laban).
Ini ang ginpasa mismo ni Garcia sa presidente sang ila partido nga si Palawan 2nd District Rep. Jose Alvarez.
Suno kay Garcia, ang nagtulod sa iya nga maghalin sa PDP-Laban amo ang pagpasaka sang kaso administratibo ni Cebu City Mayor Michael Rama batok sa iya sa Office of the President.
Sanday Garcia kag Rama ang lunsay yara sa PDP-Laban sa diin ang alkalde amo ang nagapungko nga Vice President for the Visayas.
Ginpahayag ni Garcia nga may yara sang ‘irreconcilable conflict’ sa tunga nila ni Rama.
Ang ginpasaka nga kaso ni Rama batok kay Garcia amo ang abuse of authority, oppression and grave misconduct, paglapas sa Code and Ethical Standards for Public Officials, kag Anti-Graft and Corrupt Practices Act.
Luyag man ni Rama nga ibutang si Garcia sa preventive suspension bangud may gahom ini nga maimpluwensyahan ang mga potensyal nga witness ukon pahilabtan ang ebidensya nga mangin mangin pruweba batok sa iya.
Nag-ugat ang reklamo sa pag-isyu ni Garcia sang cease-and-desist order sa pinaagi sa Memorandum No. 16-2024 batok sa Hunan Road and Bridge Construction Group Co. Ltd., kaangot sa mga construction activity nga may kaangtanan sa Cebu Bus Rapid Transit (CBRT) Project.
Ginmando man ni Garcia sa Philippine National Police nga i-monitor ang istrikto nga pagpatuman sang nasambit nga memorandum.
Ang CBRT Project ang kabahin sang mga tikang ni Presidente Ferdinand Marcos Jr. agud mapaayo ang mass transportation sa pungsod.
Gintumod ni Mayor Rama sa iya reklamo nga ang gahom nga punggan ang pagpatukod sang mga proyekto nga imprastraktura sang national government, kaangay sang CBRT, ang ginahatag lamang sa Korte Suprema gani wala sang sin-o man — lakip na ang gobernador sang probinsya sang Cebu — ang mahimo mag-isyu sang cease and desist orders batok diri.
Ginpahayag man ni Mayor Rama nga napaslawan si Garcia nga magsunod sa pagsulundan ni Presidente Marcos bangud sa pag-isyu sang memorandum apisar nga wala siya sang gahom nga himuon ini.
Dugang pa sini, wala man sang kinamatarong si Garcia nga magpahilabot sa Cebu City bangud bilang isa ka highly urbanized cities, ang Cebu City ang independent sa probinsya.
Sa subong, pending pa sa gihapon ang kaso sa Office of the President.
