Lunsay nagpasalig sang bulig ang Cebu kag Iloilo City Government agud mapa-pauli sa syudad sang Iloilo ang 23 ka mga Ilonggo mechanical engineering graduates nga na-stranded sa syudad sang Cebu.
Sa una nga exclusive interview sang Bombo Radyo kay Jomvie Pahilagao, residente sang banwa sang Leganes kag isa sa mga strandees, iya ginpahayag nga tuyo kuntani nila nga magkuha sang Licensure Examinations for Mechanical Engineers nga initially scheduled sang Agusto 15 kag 16.
Bangud sa pagsaka sang kaso sang COVID-19 kag sa bag-o nga variants of concern sa amo nga syudad, gin-kanselar sang Professional Regulation Commission (PRC) ang exam.
Sang buot na nga magpauli ang amo nga mga Ilonggo, nagpositibo ang iban sa ila sa COVID-19 lakip na si Pahilagao.
Si Pahilagao kag ang duha niya ka classmate ang gindala sa quarantine facility kag sang ginpatigayon ang contact tracing, positibo man ang iban sa ila mga kaupod sa boardinghouse.
Nagpangayo sang bulig si Pahilagao bangud wala na sila sang kwarta para sa re-swabbing kag tuman ka budlay para sa ila ang magtinir sa lugar nga wala man sila sang pamilya.
Kalabanan sa ila ang asymptomatic samtang ang iban naman sa isolation facility ang nakitaan sang mild symptoms.
Yari si Pahilagao sa iya pagpangayo sang bulig.
Sa pagpakig-angot sang Bombo Radyo Cebu sa Emergency Operations Center sang amo nga syudad, ginpahayag nga sabton sang Cebu City Government ang RT-PCR test sang mga Ilonggo kag i-facilitate ang pagpapauli sa Iloilo City sa kondisyon nga may yara lang sang Certificate of Acceptance halin sa Iloilo City Government.
Sa interview naman sang Bombo Radyo Iloilo kay Iloilo City Mayor Jerry Treñas, iya ginpahayag nga i-coordinate lang ini kay Iloilo City Disaster Risk Reduction and Management Office (CDRRMO) Head Donna Magno agud nga mabaton na sa Iloilo ang mga strandees.
Ginpakig-angutan naman sang Bombo Radyo ang CDRRMO kag natigayon nga ma-kontak sang opisina ang mga strandees para sa ila natalana nga pagpauli sa ila tagsa ka lugar sa Iloilo.
