MANILA – Ginkumpirma sang Cebu Pacific, pinakadaku nga airline company sa Pilipinas, nga magabuhin ang kompaniya sang mga empleyado sa masunod nga duha tubtob tatlo ka bulan bangud sang epekto sang coronavirus disease 2019 (COVID-19) pandemic.
Wala pa sang data ang tagpamaba sang kompaniya nga si Charo Logarta Lagamon kun pila ka empleyado ang mangin apektado apang suno sa iya, ginaproseso na subong ang nasambit nga lihok.
Gin-athag man ni Lagamon nga gintinguhaan gid sang Cebu Pacific nga malikawan ang pag-lay off sang mga empleyado kag sa pagkamatuod, nagsakripisyo pa sang ila sweldo ang mga managers sang airline company sang nagligad nga mga bulan.
“Unfortunately it’s come to a point na talagang we really need to take a look at the business conditions, environment and see how to move forwards from this,” pahayag sang tagpamaba.
Nahibaluan nga antes ang anunsyo sang Cebu Pacific, una naman nga nagbuhin sang mga empleyado ang Philippine Airlines kag ang AirAsia bangud man sang kaangay nga rason.
