ILOILO – Padayon nga ginapangita ang isa ka online seller bangud sa paggasto sang kwarta nga ginpadala sang mga kustomer nga tuyo kun tani nga magbakal sang cellphone.
Sa interview sang Bombo Radyo sa isa sa mga tagreklamo nga nagpahinago lang sa pangalan nga J sang Leon, Iloilo, iya ginpahayag nga madamo sila ang natuntuhan sang online seller nga nagahingalan kay Rexie John Quilarto sang Maasin, Iloilo.
Suno kay J, lehitimo nga manugbaligya sang cellphone si Quilarto apang sa baylo nga ihatag sa supplier ang kwarta, gingasto niya ini para sa personal nga interes.
Ginpahayag ni J nga nagalab-ot sa P18,000 ang iya nga ginpadala kay Quilarto kag madamo pa gid nga mga kustomer ang nagpadala sang bayad kabaylo sang cellphone.
Sa pagpaathag sang natungdan, mas naganyat sila bangud nagtanyag sang freebies si Quilarto kun makabaligya sila sang madamo nga unit sang cellphone.
Ginabanta nga nagalab-ot sa P200,000 ang nakuha ni Quilarto kag bangud sini, ginpahayag sang natungdan nga iya na nga ginpa-blotter sa barangay ang tuhoy sa natabo.
Nagpromisa si Quilarto nga ibalik ang kwarta apang wala man ini natuman tubtub sa subong.
Desidido nga magpasaka sang nagakaigo nga kaso ang mga tagreklamo batok sa nasambit nga online seller.
