Ginkondena ni Akbayan Representative Perci Cendaña ang sunod-sunod nga personal nga pag-atake batok sa iya ilabi na ang paggamit sang iya medical condition bilang paagi sang pagpang-insulto.
Bilang isa ka stroke survivor, ginpahayag ni Cendaña nga indi dapat paggamiton ang kondisyon sang isa ka tawo agud nga insultuhon ini ukon pakahuy-an.
Nagpaandam ang kongresista sa mga online page, influencer kag indibidwal nga nagapalapta sang amo nga mga materyal.
Ginsiling ni Cendaña nga nagakonsulta na siya sa iya mga abogado para sa posible nga legal nga tikang batok sa mga responsable sa amo nga content.
Suno pa sa kongresista, handa siya magbaton sang mga lehitimo nga kritisismo bangud kabahin ini, suno sa iya, sang iya trabaho bilang isa ka public official. Apang ginsiling sini nga indi niya pagpalampason ang mga pag-atake nga nagalab-ot na sa harassment, pagpakahuya, kag diskriminasyon.
“Bilang isang stroke survivor, hindi ko palalampasin ang ganitong pambabastos,” suno kay Cendaña.
Dugang sini: “I do this not just for myself but for all stroke survivors and Persons with Disabilities (PWDs) who are subjected to similarly demeaning, degrading and dehumanizing language and attacks.”
