Iloilo City – Ginkalipay sang Iloilo City Environment and Natural Resources Office ang mataas nga satisfactory rating nga nakuha sini sa ginpatigayon nga survey sang damlag lang sang Iloilo City Government.
Sa interview sang Bombo Radyo kay Engr. Niel Ravena, pinuno sang amo nga opisina, iya ginpahayag nga nalipay ini bangud na-apresyar sang publiko ang serbisyo sini nga ipabilin ang katinlo sang syudad.
Suno kay Ravena, kahigayunan ang survey agud makatutok ini sa paghatag sang solusyon sa mga isyu kag reklamo sang publiko kaangay sang problema sang basura.
Base sa survey, natukiban nga 94 percent sang mga basura ang nakolekta nga wala naga-agi sa segregation process.
Sa idalom sang Republic Act 9003 ukon ang Ecological Solid Waste Management Act of 2000, nasaad nga nagakadapat nga residual wastes lamang ang kolektahon sang syudad kaangay sang diapers, plastic sang mga chichirya, full vacuum cleaner bag, paper towels, kag iban pa.
Wala naman nalakip sa pagkolekta sang basura amo ang masunod: biodegradable waste, plastic, metal kag cartons, glass, waste paper, construction waste, bulky waste, kag small chemical waste.
Ginpaathag ni Ravena nga ang indi kabahin sang mga residual waste ang indi nagakadapat nga magdiretso sa material recovery facility sang tagsa ka mga barangay.
Sa subong may yara sang team nga ginpadala ang Iloilo City Environment and Natural Resources Office nga magalibot sa tagsa ka mga baranggay agud i-monitor ang practices sa paghaboy sang mga basura.
