ILOILO CITY– Indi magpabuyan-buyan ang City Environment and Natural Resources Office(CENRO) kag General Service Office (GSO) nga maamat-amat ang pagbuhin sang basura sa mga creeks kag coastal areas sa syudad.
Ini ang rason kun ngaa padayon ang information drive sa mga barangay nga natumod nga major contributors sang nagalinutaw nga mga basura.
Sa interview sang Bombo Radyo kay Punong Brgy. Virgilio Villanueva sang Boulevard, Molo, isa sa mga ginatumod nga barangay, iya ginpahayag naistoryahan na nila ni Engr. Niel Ravena nga head sang GSO ang natuhoy sa patigayunon nga garbage collection.
Suno kay Villanueva, may mga areas sa iya barangay nga mabudlay sudlon sang truck nga nagakolekta sang basura gani ginahaboy nalang ini sang mga residente sa creek ukon sa baybay.
Pahayag sang punong barangay, ila naistoryahan ang pag-assign sang tawo sa barangay nga in-charge sang kariton ukon traysikad nga magakadto sa mga suludlon nga areas agud madala ang ila nga mga basura sa collection point ukon sa MRF.
