ILOILO CITY – Magapahamtang sang dugang nga waste bins ang Iloilo City Environment and Natural Resources Office bilang solusyon sa mga nagalapta nga basura nagikan sa mga baligya nga pagkaon sang mga ambulant vendors.
Sa interview sang Bombo Radyo kay Engineer Niel Ravena, pinuno sang opisina, iya ginpahayag nga kinahanglan nga magbutang sang rules and guidelines kun paano ang insakto nga pag-dispose sang basura kag kun diin nagakaangay nga ibutang ang mga food carts agud indi mangin sablag sa mga dalanon sa syudad.
Kaangot diri suno kay Ravena, mas maayo kun mahatagan sang igtalupangod sang Iloilo City Council ang disensyo sang mga food carts sa kada distrito agud ma-identify kun sa diin nga cluster area ini nga nalakip.
Ginpahayag dugang sang natungdan nga kinahanglan pa nga matun-an sang Iloilo City Council ang sitwasyon sang mga ambulant vendors antes ang pagpasar sang ordinansa.
Nahibaluan nga nagpasar sang odinansa si Iloilo City Councilor Johnny Young nga naga-regulate sang oras sang pagbaligya sang mga ambulant vendors humalin alas 5:00 sang hapon tubtob alas 5:00 sang kaagahon bangud sa mga naglapta nga basura kag pagbilin sang mga food carts nga indi manami sa panan-awan sang mga turista.
