ILOILO CITY – Nakahanda na ang Iloilo City Environment and Natural Resources Office para sa mga hiwaton nga aktibidad para sa Byernes Santo.
Sa interniew sang Bombo Radyo kay Eng. Neil Rvena, head sang City Environment and Natural Resources Office, iya ginpahayag nga kabahin sang ila preparasyon ang pagpang-trim sang mga kahoy sa mga alagyan sang santos kag pagpanghimus sang mga posible mangin obstruction sa prusisyon.
Ginmaduan man niya ang mga sweepers nga timpranuhan pa nila sa aga ang pagpaninlo ilabi na sa mga dalanun nga alagyan sang prusisyon agud matinlo sa tion nga agyan na sang mga deboto.
Kabahin man sa ginahimu nga preparasyon ang pagpasiguro nga mangin matinlo ang plaza bangud ginalauman nga magadugok ang tawo sa mga public plaza sa syudad sang Iloilo.
Dugang pa niya, sa bahin sang parola area, magabutang ang opisina sang 15 ka mga tents agud nga pasilungan sang mga byahero nga magatabok para sa pagsaksi sang taltal sa Balaan Bukid.
Ginalauman man subong nga tuig ang madamo nga tawo nga magadugok.
Sang nagligad nga semana, nagdugang sang 10 ka mga basurahan sa area sang parola kag dugangan pa gid ini sang 10.
