ILOILO CITY – Naparalisa ang operasyon sang Central Azucarera de San Antonio (CASA) sa Passi City, Iloilo matapos mag-strike ang halos 300 ka mga empleyado sini.
Sa interview sang Bombo Radyo Iloilo, ginpahayag ni Richard Pama, board of director sang unyon sang mga empleyado sang nasambit nga sugar mill, gusto lamang nila mapalab-ot sa pamunuan sang CASA ang ginahingyo nila nga Collective Bargaining Agreement.
Nalakip diri ang hingyo sang mga empleyado nga bonus kag pasakaan ang ila suweldo.
Suno kay Pama, nagpatunga na si Passi City Mayor Jesry Palmares apang wala sila sang may ginkasugtan sang tag-iya sang Azucarera nga si Stephen Chan.
Nakalab-ot na sa National Conciliation kag Mediation Board ang problema apang nagpanindugan ang unyon nga magapadayon ang ila strike tubtob nga indi mahatag ang ila ginapangayo.
Nahibaluan nga magluwas sa pag-supply sa Pilipinas, naga-export man sang kalamay ang Central Azucarera de San Antonio sa mga pungsod sa Southeast Asia.