Ginkumpirma sang Israel Defense Forces (IDF) nga gin-igu nila ang central headquarters sang militante nga grupo nga Hezbollah sa Beirut, Lebanon.
Ginapahayag nga ang militant leader nga si Hassan Nasrallah ang target sang strikes apang wala pa sang kumpirmasyon kun napatay ini ukon nakaluwas.
Suno kay Rear Adm. Daniel Hagari, Israeli army spokesman, hungod nga nahamtang ang Hezbollah headquarters sa residential buildings sa Lebanon. Ginpahayag sini nga estretehiya ini sang militant group agud nga mahimo nga “human shield” ukon taming ang mga residente sa lugar.
Santo sa inisyal nga reports, duha na ang patay kag 76 ang nasamaran sa amo nga airstrikes, apang suno sa health ministry, ginalantaw nga magasaka ang death toll sa masunod nga inoras samtang nagapadayon subong ang search operations.
Ginapahayag nga bangud sa matunog nga pagsigabong sa kagab-ihon, anum ka buildings ang nawas-ag sa Haret Hreik neighborhood sa Dahiyeh suburbs sang Beirut.
Nabatyagan ang pagtay-og pati sa mga balay nga nahamtang 30 kilometros (18 miles) sa naaminhan sang Beirut.
Nahibaluan nga subong lamang nga semana, masobra na sa 720 ang napatay sa Lebanon bangud sa sunod-sunod nga strikes sang Israel nga naga-target nga papason ang Hezbollah ilabi na ang ila military capacities kag senior commanders.
Nagpaandam man ang matag-as nga Israeli officials nga himuon man nila sa Lebanon ang natabo nga pagpulbos sa Gaza kun magpadayon man sa pagbalos sa pag-atake ang Hezbollah.
Base sa International Organization for Migration, masobra na sa 200,000 ang na-displace sa Lebanon halin sang nagsugod ang Hezbollah sa pagpalupad sang rockets sa northern Israel bilang suporta sa Hamas nga kontra man sang Israel.
