ILOILO CITY – Nangin emosyonal ang Top 9 sang 2023 Licensure Examination for Teachers sa Secondary Level matapos nakasulod sa Top 10 sang pasinawan.
Sa interview sang Bombo Radyo kay Wenn Irabon Ricaforte nga tumandok sang Malinao, Aklan, iya ginpahayag nga dako ang nangin papel sang iya mga manunudlo agud ma-engganyo ini sa pagkuha sang kaangay nga kurso.
Suno kay Ricaforte, pinaagi sa scholarship, nahatagan ini sang oportunidad agud maka-eskwela sa syudad sang Iloilo.
Para sa topnotcher, kinahanglan gid nga may balanse sa pagtuon kun sa diin nagakadapat nga hatagan sang prayoridad ang mental kag physical health, kag indi puro tuon lang.
Ginpahayag dugang sang natungdan nga nangin pagtilaw man ang signal sa iya lugar, indi ini upang agud magpadayon sa pag-eskwela.
Si Ricaforte ang subang sa apat ka mag-ululutod kun sa diin ang amay ang nagatrabaho bilang mangunguma, samtang midwife naman ang iloy.
Nakagradwar naman ini bilang summa cum laude sang Class of 2022 sa Central Philippine University sa kurso nga Bachelor of Secondary Education Major in Science.
Sa subong, ginahulat nalang ni Ricaforte nga matapos ang kontrata sa ginsudlan nga trabaho kag natalana nga mag-apply bilang manunudlo sa private school sa Iloilo City.
