ILOILO CITY – Maswerte nga wala sang may napilasan sang natumba ang century-old narra sa Barangay Burgos-Mabini, La Paz, Iloilo City.
Sa interview sang Bombo Radyo kay Punong Barangay Lilibeth Eduardo, iya ginpahayag nga inanay lamang ang pagkatumba sang kahoy gani nakahanda pa ang driver sang salakyan kag napalayo ini sa lugar.
Suno kay Eduardo, sang una pa nakita nga delikado ang nasambit nga puno bangud sang nakita nga mga crack kag na-report na sa Department of Environment and Natural Resources.
Apang suno sa iya, indi pa man delikado ang nasambit nga puno base sa pagpadulong sang mga tiglawas sang ahensya.
Nagapati ang punong barangay nga naghuyang na ang pundasyon sini bangud sang sunud-sunod nga ulan.
Kahapon, nasaga-iran sang isa ka dako nga truck ang amo nga kahoy apang indi tuman ka baskog.
Sa subong, ginpa-evacuate anay ang mga tawo sa balay kun sa diin nahamtang ang dako nga puno.
