Ginklaro sang City Engineer’s Office (CEO) nga wala sang dako nga deterioration ukon seryoso nga guba nga nakita sa mga pasilidad sang Iloilo City Community College (ICCC) sa distrito sang Molo.
Sa interview sang Bombo Radyo kay Jose Cloyd Grecia, structural in charge sang City Engineer’s Office, iya ginpahayag nga may ara lamang sang gamay nga pagkay-o sa pila ka bahin sang eskwelahan, apang wala ini nagakahulugan nga deteriorated na ang estruktura.
Suno kay Grecia, base sa ila technical assessment, indi delikado ang kahimtangan sang Iloilo City Community College kag minor repairs lamang ang kinahanglan nga obrahon kag indi ang rehabilitasyon.
Samtang, ginbalikan man ang isyu nga isa sa ginhalinan sang rason sa pag-apruba sang Iloilo City Council sa loan agreement nga P300 million sa Development Bank of the Philippines (DBP) amo ang pagpakay-o sang building sa Iloilo City Community College sa distrito sang Molo kag ang plano nga proposed expansion sang Unibersidad sa Fort San Pedro, City Proper.
Sa matandaan nga sang nagligad nga semana gin-aprubahan na sang Iloilo City Council ang paghatag sang otoridad kay Mayor Raisa Treñas nga magpirma sa loan agreement nga labing una nga loan sang City Government sa idalom sang administrasyon ni Mayor Raisa.
