Nagapadayon ang pagsekyar sang City Engineer’s Office (CEO) sa mga drainage system sa syudad, kasunod sang opisyal nga pagpahibalo sang PAGASA sang pagsugod sang Southwest Monsoon ukon Habagat season.
Sa interview sang Bombo Radyo kay Mr. Joel Gerasmia, Chief, City Engineer’s Office, iya ginpahayag nga nagsugod na sila sang pag-inspeksyon kag paglimpyo sang mga drainage sang Mayo 28, kag una nga ginkadtuan ang La Paz area.
Suno kay Gerasmia, nadiskubrehan nga may sirado nga outfall sa kanto sang Divinigracia, nga ginatudlo nga isa sa mga posible nga rason sang madasig nga pagtaas sang tubig-ulan sa palibot sang La Paz Plaza.
Dugang pa niya, nagpatigayon man sila sang inspeksyon sa San Agustin area, kun sa diin nakita nga barado ang mga drain inlets, isa man ka mayor nga rason kon ngaa ginabaha ang amo nga lugar.
Masunod naman nga pagasekyaron sang CEO ang area sang Dungon 3, Bolilao, Iloilo City, bangud may yara sang madamo nga mga reklamo halin sa mga residente tuhoy sa padayon nga pagbaha, ilabi na kun magbubo ang mabaskug nga ulan.
