ILOILO CITY – Nagagwa sa imbestigasyon sang Hamtic Municipal Police Station nga madasig ang dalagan sang ceres bus nga nahulog sa pil-as sa Barangay Igbucagay, Hamtic, Antique nga nagresulta sa kamatayon sang 18 ka mga indibidwal lakip na ang driver sini.
Sa interview sang Bombo Radyo kay Police Staff Sergeant Japeth Jallorina, imbestigador sang Hamtic Municipal Police Station, iya ginpahayag nga base sa mga nakakita, madasig ang dalagan sang bus halin pa sa kaiping nga barangay tubtob sa pagdulhog sini sa lugar sang ginluntaran sang aksidente.
Suno kay Jallorina, indi pa matumod kun bala, nadula-an ini sang preno.
Pahayag pa niya, sa tion nga makuha na sa pil-as ang bus, ipa-tsekyar nila ini sa isa ka mekaniko agud matumod kun ano ang problema sa unit.
Ginkumpirma man niya nga may isa ka estudyante nga na-saga-iran sang bus apang wala na gindala sa ospital.
Padayon man nga gina-imbestigaran ang impormasyon nga nagalagaw nga makapila ka beses nga nag-untat ang bus bangud nga may deperensya ini.
