ILOILO CITY- Target sang kamara nga maaprubahan na sa masunod nga semana ang proposed economic amendments sa konstitusyon kadungan sang pag -resume sang interpellation kag debate kahapon.
Sa interview sang Bombo Radyo kay Iloilo 3rd District Representative Lorenz Defensor, vice-chair sang Committee on Constitutional Reforms sa kamara, iya ginpahayag nga santo sa timeline nga gintalana ni House Speaker Lord Allan Velasco bag-o ang adjournment sa Hunyo 5, target nga sa masunod nga semana na maaprubahan sa second reading ang Resolution of Both House No. 2 (RBH2).
Suno kay Defensor, may yara pa sang pila ka mga interpellators kag mangin siya ang may iga- propose man nga pila pa gid ka mga amendments sa resolution para sa mas maathag kag klaro nga mga probisyon.
Ginpasiguro naman sang Ilonggo nga mamalidha nga wala sang political provision kag nagasentro lang sa economic provisions ang ginaduso nga mga amendments sa konstitusyon.
Nahibaluan nga ang nasambit nga resolusyon nagaduso nga pahanugutan ang kongreso nga magpasar sang layi nga magabukas sang ekonomiya para sa mas madamo nga foreign investments bilang kabahin sang pagtinguha nga makarecover gikan sa recession nga gintuga sang COVID-19 pandemic.
Ang RBH2 naga- propose sang amendments sa economic provisions sa konstitusyon sa idalom sang Articles XII (National Patrimony and Economy), XIV (Education, Science and Technology) and XVI (General Provisions)paagi sa pagdugang sang mga tinaga nga “unless otherwise provided by law.”
Sa tion nga maaprubahan sa second kag third and final reading, ipasa ini sang kamara sa senado agud debatehan man sang mga senador ang proposed amendments.
Samtang, sa pahayag naman ni anay Senate President Juan Ponce Enrile nga kinahanglan sang pagbag-o sa konstitusyon agud mas mahatagan sang prayoridad ang enhancement sang armadong kusog sang Pilipinas sa tunga sang tensyon sa West Philippine Sea batok sa China, ginpahayag ni Defensor nga indi pa niya gusto ini sugilanunan.
Suno sa iya, unahon anay nila nga tutukan ang mga amendments sa economic provisions sa konstitusyon.
Para sa mamalidha, ang importante sa subong amo nga manindugan ang gobyerno kag tungdan ang obligasyon nga protihiran ang teritoryo sang Pilipinas.
