ILOILO CITY – Makigsapol si Iloilo City Councilor Carlos ‘Jojo’ Javellana sa pamunuan sang Iloilo City Police Office (ICPO) natuhoy sa ila proposal nga pagbutang sang mga numero sa helmet sang mga motorista sa syudad sang Iloilo.
Sa interview sang Bombo Radyo kay Councilor Javellana, chairman sang Committee on Police Matters kag Peace and Order sa konseho, iya ginpahayag nga magasapol siya sa director sang ICPO nga si Police Col. Uldarico Garbanzos kag lakip na ang mga chief of police agud mahusay kag maathag ang mga solusyon agud madasig nga makilal-an ang motor-riding suspect ukon masolbar ang krimen.
Suno kay Javellana, wala pa siya sang ideya kun ano ang kabug-usan nga tinutuyo sang ICPO sa ila rekomendasyon.
Pahayag ni Javellana, ginamanduan man niya ang tanan nga mga Punong Barangay sang Iloilo City agud mas pabaskugon pa ang paglibot sang mga barangay tanod kun kaagahon kag kagab-ihon sa diin masami nagakatabo ang krimen.
Dugang pa sang konsehal, sa tion nga magpatigayon sang checkpoints ang mga pulis, yara man ang iya presensya agud mamonitor ang nagakatabo sa syudad sang Iloilo.
Matandaan nga ang pagpabutang sang sticker nga may plaka sa helmet sang mga motorista ang nakit-an sang ICPO nga isa sa mga solusyon agud madasig nga makilal-an ang motor-riding suspect ukon masolbar ang krimen.
