ILOILO CITY – Ginarespeto sang chairman sang Committee on Transportation sa Iloilo City Council ang ginhimo nga unity caravan sang ginabanta 400 ka mga modernized kag consolidated traditional jeepneys kahapon, Agusto 5.
Lakip sa mga nag-upod diri amo ang mga myembro sang mga transport cooperatives sang Western Visayas Alliance of Transport Cooperatives and Corporations, Inc. (WVATCCI).
Ginsakop sang mga ini ang isa ka lane sa kada side sang four-lane road sang Benigno Aquino Avenue ukon mas kilala nga Diversion Road.
Sa interview sang Bombo Radyo kay Iloilo City Councilor Atty. Sedfrey Cabaluna, chairman sang nasambit nga komitiba, iya ginpahayag nga may kinamatarong man ang mga myembro sang kooperatiba nga magpahayag sang ila sentimento kaangot sa ginaduso sang Senado nga pag-suspend sang Public Transport Modernization Program.
Suno kay Cabaluna, isa man ini ka pamaagi agud matun-an sang gobyerno ang bahin sang mga nag-upod sa kooperatiba kag indi lang ang mga nagapamatok sa modernization program.
Ginpahayag sang konsehal nga nagakadapat nga indi pag-ibutang sang gobyerno sa alang-alang ang sitwasyon sang publiko ilabi na ang mga nagasakay sa pampubliko nga salakyan kag ang mga pamilya sang mga maapektuhan sang programa sa sektor sang transportasyon.
