ILOILO CITY- Mabaton na sang mga public school teachers ang ila P5,000 teaching supplies allowance antes ang pagbukas sang klase sa Lunes.
Suno kay Education Secretary Sonny Angara, sa tion nga magbukas na ang klase, may yara na sang allowance ang mga teachers para sa ila kinahanglanon.
Ginpahayag man sang education chief nga matapos napirmahan ni President Marcos ang Kabalikat sa Pagtuturo Act, lauman sang public school teachers nga may mabaton sila nga P10,000 sa teaching supplies allowance sa masunod nga tuig.
Sang nagligad nga bulan sang ginpirmahan ni Marcos ang Kabalikat sa Pagtuturo Act, nga nagamando sang P10,000 teaching allowance para sa public school teachers sumugod sa School Year 2025-2026.
Magluwas diri, ginpahayag ni Angara nga maga-propose ang Department of Education sa pagtukod sang dugang nga teaching positions magluwas sa Teacher I kag Teacher III, bilang kabahin sang promisa ni Marco sa iya State of the Nation Address.
Ginpahayag sang Presidente nga nagpain ang gobyerno sang pondo agud magpatuman sang expanded career progression system para sa public school teachers, nga magapahanugot sa manunudlo nga magpataas sang ila ranggo kag wala sang public school teachers nga magaretiro bilang isa lang ka Teacher I.
Pahayag ni Angara, ginatutukan nila ang promosyon nga base sa merito bangud ini ang nagapadismaya sa mga manunudlo nga madugay na sila nga nagatudlo apang wala gid sila nahatagan sang promosyon.
