𝗜𝗟𝗢𝗜𝗟𝗢 — Nagsulod na sa mga bank accounts sang mga manunudlo ang teacher’s allowance ukon anay ginatawag nga chalk allowance.
Sa interview sang Bombo Radyo kay Mr. Leonil Salvilla, Spokesperson sang Schools Division of Iloilo, iya ginpahayag nga kasunod sang bukas-klase subong nga adlaw, nagbukas man ang good news para sa mga manunudlo.
Suno kay Salvilla, mahimo na nga makuha sang mga manunudlo ang teachers allowance ukon chalk allowance sa ila tagsa ka debit card ukon Automated Teller Machine Card.
Ginpahayag man sini nga mabaton sang tagsa ka manunudlo ang P5,000 nga na-release paagi sa finance division sang talatapan agud magamit sa ila kinahanglanon samtang nagatudlo.
Ginkalipay man sang natungdan nga ini ang labing-una nga kahigayunan nga non-taxable ang amo nga allowance.
Samtang, santo naman sa bag-o nga layi, magataas pa ang teachers allowance sa masunod nga tuig nga mahimo mangin P10,000.
