Ginbasura sang International Criminal Court (ICC) Pre-Trial Chamber I ang challenge to jurisdiction nga gin-file sang kampo ni former president Rodrigo Duterte.
Sa desisyon sang ICC nga pirmado sang tatlo ka judges, ginsiling sini nga “under consideration” ukon ginkonsiderar na nga daan sang korte ang mga alegasyon sang mga krimen nga nahimo sa Pilipinas antes pa man nag-withdraw ang pungsod sa Rome Statute sang 2019.
Ang Rome Statute amo ang treaty nga nagtukod sa ICC.
Gin-reject sang ICC ang mga argumento sang mga abogado ni Duterte nga lain nga bagay ang preliminary examination kag ang desisyon nga mag-authorize sang imbestigasyon.
Bangud sini, sandig sa 32 ka pahina nga desisyon sang ICC, nakit-an sang Chamber nga ma-exercise gid sang korte ang hurisdiksyon sini sa kaso subong sa mga krimen nga nahimo ni Dutrerte sa teritoryo sang Pilipinas samtang ini ang state party pa sa Rome Statue.
“For all of the above reasons, as a result of the Prosecution’s preliminary examination having commenced prior to both the Philippines depositing its written notification of withdrawal from the Statute and the date on which that withdrawal became effective, the Chamber finds that the Court can exercise its jurisdiction in the present case over the crimes alleged against Mr. Duterte that were committed on the territory of the Philippines while it was a State Party,” kabahin sang ruling.
Ini nga desisyon nagakahulugan nga makapadayon ang kaso nga nagasakop sang mga ginaalegar krimen nga nahimo ni Duterte sa tunga-tunga sang Nobyembre 2011 kag Marso 2019 sang tion nga myembro pa ang Pilipinas sang Rome Statute.
Matandaan nga sa argumento sang mga abogado ni Duterte, ila ginpakigbato nga wala sang gahum ang ICC bangud nag-withdraw man ang Pilipinas. Ila ginsiling nga nag-withdraw ang Pilipinas sa Statute epektibo sang Marso 17, 2019, kag nag-file naman ang prosecution sang request kag naghimo ang Pre-Trial Chamber sang desisyon duha ka tuig pa ang nakaligad.
Kasunod sini nga ruling sang chamber, isa na lang ang pending nga request sang kampo ni Duterte sa ICC. Ini amo nga i-adjourn ang proceedings bangud sa ila ginapahayag nga maluya nga kondisyon sang former president nga rason kun ngaa indi na ini makasarang pa nga magtindog sa trial.
May mga medical expert naman nga gintugtan nga maka-check kay Duterte kag natalana nga magpasa sang ila nga findings sa hingapusan sini nga bulan.
Kun balikan, Marso 11, 2025 sang gindala si Duterte sa detention facility sang ICC sa The Hague, Netherlands.
