MOLO, ILOILO CITY – Nagakinahanglan nga isaylo sa lain nga puluy-an ang apat ka kabataan ni Lorry Mae Baylon, ang 27 anyos nga nagabusong nga babaye nga napatay matapos ginaalegar ginkastigo sang iya kasilingan nga retired nga pulis kag asawa sini nga maestra sa Zone 5, Boulevard, Molo, Iloilo City.
Ang apat ka kabataan nga nailo sa iloy ang nagapang-edaron sang 12, 6, 5, kag 3 ka tuig.
Kaupod nila sa ila nga balay ang ila tiya bangud bulagay man ang ila amay kag iloy.
May stepfather sila apang naka-lockdown pa subong sa Metro Manila.
Sa interview sang Bombo Radyo kay Iloilo City Social Welfare Development Office (CSWDO) Head Teresa Gelogo, iya ginpahayag nga tikang ini sang otoridad agud ma-address ang ginapahayag trauma nga nabatyagan sang mga bata sang natabo ang ginaalegar nga pagpangastigo sa ila nga iloy sang nagligad nga Marso 24.
May natumod naman nga balay nga sayluhan sang mga bata kag ginsigurado man sang CSWDO nga pamilya ini sang mga bata bangud kinahanglan pa nila ang ‘maayo nga pag-atipan kag pagpalangga’.
Magluwas diri, may ihatag man nga food and financial assistance ang Iloilo City Government sa apat ka mga kabataan kag burial assistance sa pamilya sang napatay nga si Baylon.
Nalubong naman ang bag-ong bun-ag nga lapsag ni Baylon sang Sabado.
Ginahulat man subong ang resulta sang autopsy examination sa bangkay ni Baylon agud mahibaluan ang gintunaan sang iya kamatayon kag agud mahibaluan man kun sin-o sa duha ka kampo ang nagasugid sang matuod bangud hugot man ang panindugan sang retired police kag asawa niya nga maestra nga indi matuod ang mga alegasyon nga ginahaboy batok sa ila.
