Ginpasakaan na sang sampaw-sampaw nga mga reklamo nga murder kag serious illegal detention ang negosyante nga si Charlie “Atong” Ang nga amo ang ginatudlo nga mastermind sang pagkadula sang mga manugbulang sadtong 2021 kag 2022.
Ginhingadlan man sa reklamo ang mga myembro sang “Alpha Group” nga suod kay Atong kag mga katapo sang Philippine National Police.
Suno sa pamilya sang missing sabungeros nga amo ang complainants, yara man sa listahan sang ginpasakaan sang reklamo ang aktres nga si Gretchen Barreto kag ang anay hepe sang National Capital Region Police Office nga si retired Police General Jonnel Estomo.
Matandaan nga sanday Atong, Gretchen, kag Estomo ang lunsay na nakapaguwa sang statement nga nagapanginwala nga may kahilabtanan sila sa pagkadula sang mga manugbulang.
Suno naman kay Justice Secretary Jesus Crispin Remulla, may yara sang witness nga nagbulgar sang mga ginhimo ni Atong bilang mastermind kag bilang pinuno sang isa ka criminal organization.
Ginlakip man sa complaint suno kay Remulla ang mga affidavits sang whistleblower nga si Julie “Dondon” Patidongan kag iya nga mga utod.
