ILOILO CITY- Ginalantaw ni Retired Police Major Charlie Sustento nga pamaagi lang sang mga pumuluyo sang pagpakita sang suporta para sa ila plano nga magpadalagan sa masunod nga eleksyon ang napangtapik nga mga tarpaulin.
Nabutang sa tarpaulin ang mga tinaga nga “Sa Cuarto Distrito, Oso na ang Pineula kag Sustento.”
Sa interview sang Bombo Radyo kay Sustento, iya ginpahayag nga pagpabutyag ini sang mga pumuluyo nga luyag nila sang bag-o nga mga lideres nga magapamuno sa ila distrito.
Suno pa kay Sustento, nahangpan niya nga ang handom sang mga tawo amo ang isa ka lider nga wala lang nasandig sa kwarta ang panghimanwa kag halos indi man mapalapitan kag makita sang mga pumuluyo.
Matandaan nga sang Abril pa ginkumpirma ni Sustento ang ila plano ni retired Police Lt. Col. Jonathan Pinuela nga magpadalagan sa 2025 midterm elections.
Apang ginapilian pa kun sino sa ila nga duha ang magapadalagan bilang Representative kag Board Member.
Indi naman mapat-ud ni Sustento kun si Board Member Domingo Oso ukon ang anak sini nga ginabati-bati man nga magpadalagan ang ginatumod sa amo nga tarpaulin.
Apang ginkumpirma sini nga magparyentehanay man lang sila ni Oso.
Madumduman nga isa si Board Member Oso sa ginaduso nga magpadalagan sa pagka-bise gobernador agud mangin ka-tandem ni Governor Arthur Defensor Jr. nga amo naman ang ginasuportahan ni Sustento.
Sang nagligad nga eleksyon, magkaupod sa partido sanday Oso kag si Iloilo 4th District Board Member Ferj Biron nga amo ang mortal nga kaaway ni Sustento.
“I cannot confirm, I cannot deny nga mapadalagan kita Congressman or Board Member. We are on the process of consultation.”
Sang Hunyo ,ginpahayag ni Biron nga plano niya nga magpa-reelect kag kun magdesisyon si Sustento nga magpadalagan bilang Congressman, sila nga duha ang magabungguanay.
