Chavit Singson, nagpanawagan sa pag-upod sa ‘one time, big time’ rally batok sa kurapsyon

Nagpanawagan si anay Ilocos Sur Governor Chavit Singson nga mag-upod sa “one time, big time” rally batok sa mga alegasyon sa flood control projects.

Suno kay Singson, dapat matabo ang protesta “as soon as possible” ukon ASAP.

Nagaplano man ini nga magpakig-angot sa mga relihiyoso nga organisasyon nga nagapamatok man sa graft kag sa kurapsyon.

Sang ginpamangkot siya kun patigayunon ini sa Pebrero, naghando man ini, apang nakadepende suno sa iya sa makasugtan nga schedule.

Sa Pebrero iga-komemorar ang 40th anniversary sang EDSA People Power revolution nga amo ang nagsipa kay former President Ferdinand Marcos, Sr.

“Nasa grupo yan. Ang magde-decide ang religious organizations, the opposition, lahat ng nagmamahal sa ating bansa. Tawagin niyo lahat, tawagan niyo ako. I will prefer yung kabataan ang magsabi ng date,” suno naman kay Singson.

“Dapat kasama ang kabataan dito kasi ninakaw ang future ng kabataan…Ang kabataan ang kinabukasan ng ating bansa, yan ang sabi ni Jose Rizal…Future niyo ito… tumayo kayo, huwag kayo matakot, kasi future niyo ito,” dugang niya.

Kabahin ini sang ginpanghambal ni Singson sa iya nga press conference kun sa diin gin-akusaran sini si President Bongbong Marcos kag si anay House Speaker Martin Romualdez nga amo suno sa iya ang sa likod sang kurapsyon.

Ginhangkat man ni Singson si Romualdez kag si Marcos sa debate. Suno sa iya, handa siya nga magkadto sa Malacañang.

Wala naman ginsapak sang Palasyo ang hangkat.

Suno kay Presidential Communications Undersecretary Claire Castro, wala dapat ginapaagi sa debate ang away batok sa kurapsyon, kundi paagi sa paghulag kag pagpasabat sa mga tawo nga involve.

Pahayag ni Castro, masako ang presidente sa pagpa-umwad sang kabuhi sang mga tawo kag sang ekonomiya. Ang kinahanglan suno kay Castro amo ang maayo nga panggobyerno, kag indi ang pagpakuno-kuno lang sa atubang sang media.