HAMTIC, ANTIQUE – Hugot nga ginapatuman subong nga adlaw ang checkpoint sa Antique nga ginpangunahan sang banwa sang Hamtic nga amo ang entry point sang probinsya halin sa Iloilo.
Ini ang kasunod sang border restrictions nga ginmandu ni Antique Gov. Rhodora Cadiao.
Sa interview sang Bombo Radyo kay PMaj. Adolfo Pagharion, hepe sang Hamtic Municipal Police Station, iya ginpahayag nga kaupod sang mga kapulisan sa pagpatigayon sang checkpoint amo ang Municipal Health Officers agud nga ma tsekyar sang hugot ang mga kondisyon sang tawo nga nagasulod sa probinsya.
Suno kay Pagharion, kun naghalin sa probinsya sang Iloilo ukon pangayaw ang tawo nga masulod sa Antique, kinahanglan magdala sang company ID nga nagapamatuod nga nagatrabaho ini sa probinsya ukon may yara sang transaksyon.
Antes pa man pahanugutan nga makasulod sa Antique, nagakadapat nga sabtan anay sang pangayaw ang information sheet.
Sa bahin naman sang mga tumandok sang Antique, indi na kinahanglan pa nga magsabat sa information sheet sa baylo magdala na lang sang ID.
Ginapapanaog man ang mga tawo nga sakay sang salakyan kag ginatsekyar sang non contact thermometer agud mahibaluan ang ila body temperature.
