ILOILO– Ginapapasa na sang Commission on Higher Education (CHED) sang report ang tanan nga State Colleges and Universities kag Private Higher Education Institutions bag-o magbukas ang klase.
Sa interview sang Bombo Radyo kay Dr. Rex Casiple, Chief Education Program Specialist sang CHED, iya ginpahayag nga ang State Colleges and Universities ang maga-umpisa sang klase sa bulan sang Agosto samtang ang mga Private Higher Education Institutions ang maga-umpisa na sang klase sa bulan sang Hunyo.
Kun maglapaw naman sa gintalana nga schedule, nagakinahanglan na nga may yara sang pahanugot sang CHED.
Ginpahayag ni Dr. Casiple nga ginamandu-an sang CHED ang tagdumalahan sang mga natungdan nga eskwelahan nga magpasa sang report tuhoy sa ila pagpanghanda may kaangtanan sa pagbukas sang klase.
May yara naman sang monitoring nga patigayunon ang CHED agud nga mahibalu-an kun ano ang kalidad sang edukasyon nga ginahatag sang tagsa ka eskwelahan sa sa mga estudyante.
