ILOILO CITY– Ginkumpirma sang Commission on Higher Education nga ginapahanugutan na ang face to face nga klase sa kolehiyo.
Sa interview sang Bombo Radyo kay CHED Program Specialist Dr. Rex Casiple, iya ginpahayag nga mahimo na nga makapatigayon sang face-to-face nga klase apang limitado lang sa 50% ang mahimo makasulod sa classroom.
Suno kay Casiple, nakadepende na sa State Universities and Colleges ang pag schedule sang klase sang mga estudyante kag kun ano ang igapatuman nga preventive measures.
Ginadumili-an man suno kay Casiple ang pagpatigayon sang aktibidad kun sa diin maka-engganyo sang madamo nga audience.
May yara sang mga eskwelahan nga magagamit sang modular learning, online ukon mixed nga pamaagi sa pagtudlo.
Subong nga Hunyo suno kay Casiple, mahimo na nga makabukas ang State Universities and Colleges nga may yara sang online education kag pagabuksan naman sa Agosto ang mga may yara sang flexible learning, samtang ang face-to face classes ang magasugod sa bulan sang Setyembre.
Sa pagpatigayun sang face-to-face nga klase suno sa iya, kinahanglan nga sundon ang physical distancing bilang health protocol.
Ginpahayag ni Casiple nga wala sang scholarship sa subong para sa mga first year students apang sa mga scholar na nga daan, kinahanglan nga i-check sang school management kun bala may pondo pa para diri.
