Patigayunon diri sa syudad sang Iloilo ang CHED RAISE Summit 2026 isa ka national higher education forum nga ginapangunahan sang Commission on Higher Education (CHED), nga magatutok sa papel sang artificial intelligence (AI) kag iban pa nga emerging technologies sa pagbag-o sang sistema sang edukasyon sa Pilipinas.
Sa interview sang Bombo Radyo kay Dr. Raul Muyong, Regional Director sang CHED Region 6, iya ginpahayag nga pagatambungan sang nagkalain-lain nga representante halin sa 18 ka rehiyon ang nasambit nga forum.
Ang RAISE summit nagakahulugan sang ”Responding through AI for Societal Empowerment,” nga may katuyuan nga palapron ang innovation, inclusivity kag ang responsable nga paggamit sang AI sa pagtudlo, pagtuon, research kag community engagement sang mga kolehiyo kag unibersidad sa pungsod.
Ini na ang ikatatlo nga paghiwat sang nasambit nga summit kag patigayunon ini sa Visayas kag diri mismo sa Iloilo Convention Center sa Pebrero 25-27, 2026.
Maga-upod man diri ang mga opisyal sang CHED kag mga partner institutions kun sa diin ginapaabot man nga magatambong si DepEd Secretary Sonny Angara kag Department of Science and Technology Secretary Dr. Renato U. Solidum Jr.
Ginpahayag man ni Muyong nga ila ginhandaan ang kaangay sini nga summit sa bulig sang Northern Iloilo State University (NISU) kag West Visayas State University (WVSU) nga amo ang nagapanguna sa preparasyon sang aktibidad sa rehiyon.
Kabahin sang summit ang paghatag kahigayunan sa mga estudyante nga makapakita sang ila abilidad paagi sa Artificial Intellegence.
Ginpabutyag man sini ang kaimportansya sang AI sa edukasyon ilabi na sa digital transformation kag confirmation sang mga academic outputs.
Apang, gin-athag ni Direktor Muyong nga ang AI isa lamang ka tool kag indi dapat pagsaligan bangud posible ini magdula sang critical thinking skills sang mga estudyante.
Katuyuan man sang CHED RAISE Summit nga palaparon ang ihibalo sang higher education institutions kun paano gamiton ang AI para sa transformation kag empowerment sang komunidad.
Ginalauman nga pinaagi sa summit, ma-inspire ang mga estudyante kag manunudlo nga maghimo sang mas madamo pa nga innovation gamit ang AI nga may ara sang balanse sa teknolohiya kag critical thinking skills.
