Mainit nga gin-abi-abi ang mga kandidata sa Miss Universe 2024 sa ila pag-abot sa host country nga Mexico.
Isa diri si reigning Miss Universe Philippines Chelsea Manalo nga antes nagkadto sa South America, naghapit pa anay sa Los Angeles, California, United States para sa dugang nga training.
Sang nag-abot ini sa Mexico, suksok sini ang golden modern Filipiniana nga himo ni Cary Santiago.
Sa iya Instagram story, ginpakigbahin man ni Chelsea nga roommates sila ni Tatiana Calmell sang Peru.
May mini reunion man si Chelsea sa iban nga half-Filipinas nga maga-compete sa Miss Universe — si Victoria Velasquez Vincent sang New Zealand, Christine Dela Cruz Chalk sang Great Britain, kag Shereen Ahmed sang Bahrain.
Pareho nga nag-compete sanday Victoria kag Christina kaupod kay Chelsea sa Miss Universe Philippines 2024 kun sa diin sulod si Christina sa Top 20 samtang nagtapos naman si VVV sa Top 10 kag may tatlo ka sponsored awards.
Si Chelsea ang una nga Filipino-Black American nga ginkoronahan nga Miss Universe Philippines.
Sa Nobyembre 17 (oras sa Pilipinas) nga amo ang adlaw sang koronasyon, maga-serbe man bilang commentator si Miss Universe 2018 Catriona Gray.
Ini na ang ikatlo nga tuig nga magaserbe ang Pinay-Australian beauty queen bilang commentator — una sa New Orleans, Lousiana sang 2022, ikaduha sa El Salvador sang 2023, kag subong nga tuig sa Mexico City.
