Photo By Meriza Pinuela
ILOILO CITY – Agaw atensyon ang rosy trumpet tree sa Sen. Benigno Aquino Jr. Avenue, Mandurriao, Iloilo City nga kasubong sang cherry blossoms sa Japan.
Ang scientific name sang nasambit nga rosy trumpet tree ang ginatawag nga Tabebuia rosea kag ginakabig nga national tree sang El Salvador.
Madamu ang mga nagapakuha sang laragway sa nasambit nga rosy trumpet tree nga trending pa sa social media.
Suno kay Engr. Al Fruto, assistant regional director sang Department of Public Works and Highways (DPWH) 6, ang pagtanum sang nasambit nga tanum ang ginpanugyan sang isa ka private consultancy firm.
Ini bangud nga ang rosy trumpet tree ang nagapamulak sa tion sang tig-ilinit kag makasarang nga mabuhi sa pihak sang tuman ka init nga tiyempo.
