ILOILO CITY – Indi na madayon ang pagpungko ni Chief Insp. Jovie Espenido bilang director sang Iloilo City Police Office (ICPO).
Ini ang gin-anunsyo ni Police Regional Office 6 (PRO-6) director Chief Supt. Cesar Hawthorne Binag.
Suno kay Binag, subong nga adlaw nila nabaton ang mando gikan sa Kampo Crame nga nagapahayag nga ginakanselar na ang assignment ni Espenido sa Iloilo.
Gindesignar sang PNP headquarters bilang bag-o nga director sang Iloilo City Police Office si S/Supt. Henry Binas.
Nahibaluan nga kahapon sa interview sang Bombo Radyo Iloilo, ginpahayag ni Espenido nga indi sini mahimo bayaan ang Ozamiz City nga wala pa matapos ang trabaho.
Apisar napatay na si Mayor Reynaldo Parojinog, ginpahayag ni Espenido nga may pila pa ka miyembro sang pamilya Parojinog ang wala pa madakpan.
Suno pa kay Espenido, mismo ang mga pumuluyo sang Ozamiz City ang nagapakitluoy nga indi siya maghalin sa siyudad.
