ILOILO CITY – Emosyonal samtang nagapasalamat sa Bombo Radyo ang isa ka Chief Mate matapos nabalik ang mga importante nga dukomento nga nabilin sa isa ka depampasahero nga jeep sa syudad sang Iloilo.
Suno sa tag-iya nga si Innocentes Vaño sang Pavia, Iloilo, nagsakay siya sa Jaro CPU nga jeep kag bangud nga nagadali, wala na niya natalupangdan nga nabilin ang folder nga naga-unod sang dokumento.
Ginpahayag ni Vaño nga sang iya nadumduman, gilayon siya nga nagpangayo sang bulig sa iya anak kag nagpa-blotter sa Police Station 1.
Una niya nga ginpadulungan ang Panawagan Section sang Bombo Radyo kag nakumpirma nga isa ka honest jeepney driver ang nag turn-over sini.
Bilang balos, ginhatagan ni Vaño sang padya ang honest jeepney driver nga si William Solinap.
Tuman ang kalipay sang isa ka honest jeepney driver sa padya nga iya nabaton matapos gin turn-over sa Bombo Radyo ang dukomento nga nabilin sa ginamaneho nga jeep.
Suno kay William Solinap, driver sang Jaro CPU nga jeep, wala gid siya naglaum nga makabaton sang padya bangud kalipayan para sa iya ang makabulig.
Ginpahayag ni Solinap nga ang P1,000 kag ang $20 nga cash nga iya nabaton gikan sa tag-iya nga si Innocentes Vaño sang Pavia, Iloilo ang daku nga bulig.
Sa pagkamatuod suno kay Solinap, ang iya ginansya sa sulod sang isa ka adlaw ang yara lamang sa P150-P200 bangud tuman ka gamay sang pasahero.
