ILOILO CITY – Nagpanugyan ang Iloilo City Council sa Land Transportation Office (LTO) kag Department of Transportation (DOTr) nga ipaiway anay ang pagpatuman sang Republic Act (RA) No. 11229, ukon ang Child Safety in Motor Vehicles Act.
Nasaad sa nasambit nga pagsulundan nga umpisa subong nga adlaw, Pebrero 2, ang mga kabataan nga edad 12 anyos panubo ang nagakadapat nga magpungko sa back seats sang salakyan.
Sa interview sang Bombo Radyo kay Iloilo City Councilor Atty. Rommel Duron, chairman sang Committee on Rules, Ordinances, Resolution, Style, Justice and Legal Affairs sa Sangguniang Panlunsod, iya ginpahayag nga nagakadapat antes ipatuman ang layi, magapatigayon anay sang information dissemination ang LTO kag DOTr.
Nagatuga man suno kay Duron sang pagsalangisag sa mga pumuluyo ang pagbakal sang nagakaigo nga car seat nga ginarequire sa idalom sang RA 11229 sa diin dapat may yara sang Philippine Standards mark ukon Import Clearance Certificate.
Suno kay Duron, ang layi amo ang para lamang sa mga private utility vehicles kag wala malakip ang public utility vehicles.
Maayo man kuntani suno sa natungdan ang programa nga ginaduso sang layi bangud para ini sa proteksyon sang mga kabataan apang may yara sang dako nga kakulangan sa preparasyon.
Dugang pa sang natungdan, indi man makadali-dali nga makabakal sa subong nga panahon sang pandemya ang mga tawo sang car seat nga aprubado sang Department of Trade and Industry (DTI) bangud magluwas sa mahal, maiwat man ang balaklan.
Nahibaluan nga sa idalom sang RA 11229 nga ginpirmahan ni Presidente Rodrigo Duterte sang 2019, ang mandatory nga paggamit sang child restraint systems (CRS), ang para sa mga kabataan edad 12 anyos panubo nga may height nga 4’11” panubo.
Ang CRS ang nagakadapat nga santo man sa edad, height, weight sang bata kag ipahamtang sa rear seat sang salakyan.
Nagakadapat man nga ang CRS ang magsunod sa standard nga ginpapanaog sang DTI, santo sa Department Administrative Order No. 20-03.
Samtang, ginpamatukan naman sang pila ka mga ginikanan ang amo nga layi.
Sa interview sang Bombo Radyo kay Mary Ann Palmejar Puertollano, isa ka iloy, iya ginpahayag nga nagadangat sa 5,000 tubtob P15, 000 ang presyo sang car seat.
Suno kay Puertollano, kun magbakal sila sang car seat para sa iya duha ka kabataan, indi pat-od nga yara ini sa standards sang DTI kag tuman ka mahal ang ila magasto.
Dugang pa niya, indi na lang niya pagpasakyon ang iya mga kabataan sa ila salakyan agud indi na siya magproblema sa multa.
Matandaan nga ang multa sa magalapas sa RA 11229 ang maga-umpisa sa P1,000 sa first offense kag P2,000 sa second offense ukon P3,000 bangud sa indi insakto nga CRS.
Samtang ang third kag succeeding offenses naman ang magapatuman sang P5,000 nga multa kag isa ka tuig nga suspension sang driver’s license.
Magluwas sa indi pagsunod sa pagbutang sang mga kabataan sa insakto nga car seat, ang iban pa nga mga ginadumilian sa layi amo ang pagpapungko sa mga bata sa front seat sang salakyan, pagbilin sa ila nga wala may nagabantay sa mga salakyan kag pagamit sang substandard ukon expired nga child seats.
