ILOILO CITY – Madata sa gihapon ang human trafficking ilabi na ang child prostitution sa syudad sang Iloilo.
Sa interview sang Bombo Radyo kay Police Chief Master Sergeant Debbie Yocogco, pinuno sang Women’s and Children’s Protection Desk sang Police Station 1, iya ginpahayag nga may yara sa gihapon sang child prostitution sa syudad sang Iloilo sa pihak sang istrikto nga pagpatuman sang layi nga nagadumili sa human trafficking.
Mismo siya suno kay Yocogco ang makapamatuod sang nagakatabo nga child prostution ilabi na sa bahin sang Ledesma, Quezon kag Valeria sa City Proper area.
Mismo ang mga tricycle drivers ang nagaserbe nga bugaw sa mga menor de edad nga ginagamit nga commercial sex worker.
Ginpahayag ni Yocogco nga may yara sila sang impormayson nga nabaton nga may mga lodging house sa syudad sang Iloilo nga nagabaton sang child prostitution.
Sa subong, padayon ang kampanya sang Philippine National Police agud nga matapna ang kasubong nga buluhaton.
Samtang, ginaduso naman sang Anti-Trafficking In Persons Advocates’ Network (ATIPAN) Inc. sa mga Local Government Unit nga magdihon sang ordinansa nga indi mahatagan sang permit ang mga KTV kag videoke bar owner nga wala naka-seminar sa child trafficking kag nagabaton sang menor de edad nga empleyado.
Sa interview sang Bombo Radyo kay Ret. Col. Ma. Cecilia Detablan sang nasambit nga grupo, iya ginpahayag nga makabig nga makatulublag ang madamu nga numero sang child trafficking sa pungsod.
Ginpahayag ni Detablan nga nagakadapat nga matapna na ang kasubong nga buluhaton agud nga indi mangin sex tourism ang Pilipinas.
