Siling nila, “a mother’s love knows no bounds.”
Siguro ang aton mga iloy mismo ang makapamatuod sini kag kita mismo ang maswerte nga naka-eksperyensya sang amo sini nga sahi sang pagpalangga.
Apang nakit-an mo na bala ini sa isa ka sapat?
Sa Bioparc Valencia nga isa ka zoo sa Spain, madamo ang nakakilala sa chimpanzee nga si Natalia — indi lang ang iya pangalan ang popular kundi ang tumalagsahon sini nga istorya.
Nagbata si Natalia sa iya baby chimpanzee sang Pebrero, apang duha ka semana ang nakaligad, sa masubo nga palad, napatay ang bata sini.
Nangin mabudlay para kay Natalia nga magpaalam sa iya bata gani madamo gid ang nasakitan sang nakit-an kun ano ang iya nga ginhimo.
Bisan patay na ang baby chimpanzee, wala gid ini ginbuy-an sang iya iloy kag ginakugos gid bisan diin siya magkadto.
Wala sini ginhal-id ukon ginbutang sa duta ang iya baby tubtub nga naagnas na ini kag tul-an na lang ang nabilin.
Pito ka bulan sini nga ginkugos ang iya baby, kag subong nga bulan suno sa zoo, daw kaangay nga nabaton na ni Natalia ang kapalaran sang iya baby.
Naghalong gid ini sa pagbutang sa bangkay sang iya bata sa kahilamunan kag gintalikdan.
Gin-respeto sang mga zoo keeper ang paglalaw ni Natalia, kag sang ginbuy-an na sini ang baby chimpanzee, didto pa lang kag nagpahilabot na ang management kag ila ini ginlubong.
Antes gali ang natabo kay Natalia subong nga tuig, napatay man ang isa pa gid sini ka anak sang 2018 gani nga ginabantayan gid sang zoo ang iya nga behavior nga daw kaangay nga isa ini ka tawo.
Ginapaathag man sang zoo sa mga bisita ang pagginawi ni Natalia kag pati na ang pag-isahanon sini kun kaisa nga ginalantaw senyales gihapon sang pagpangasubo sini sa pagkadula sang iya nga bata.
