May natabo na naman nga insidente sa tunga sang China kag duha ka military aircraft sang Pilipinas sa West Philippine Sea.
Ginahulat pa ang kumpirmasyon kag statement halin sa bahin sang Pilipinas, apang kun basehan ang foreign ministry sang China, nagsulod ang duha ka aircraft sang Pilipinas sang Agusto 22 sa airspace malapit sa Nansha Islands kun sa diin nalakip ang Zhubi Jiao (Subi Reef).
“On August 22, two Philippine military aircraft trespassed into the airspace near the Nansha Islands, including Zhubi Jiao (Subi Reef), where China is stationed,” pahayag sang foreign ministry sang Beijing.
Ginsiling man sini nga naghimo sila sang countermeasures nga sandig sa layi para nga maprotektahan ang ila nga soberanya kag seguridad.
Wala ginpatpat sang China kun ano ang ila ginhimo apang ginlaragway nila ang ila tikang nga “professional, restrained, and standardised”.
Antes ini nga insidente, matandaan nga subong man nga semana, nagbungguanay man ang coast guard ships sang Pilipinas kag China sa Sabina Shoal nga nahamtang 140 kilometres (86 miles) west sang Philippine island sang Palawan kag 1,200 kilometres naman halin sa Hainan island.
Ini nga shoal ang sulod sa exclusive economic zone sang Pilipinas apang nagsiling ang China nga naga-trespass ang Pilipinas rason kun ngaa nahimo nila ang delikado nga mga maniobra.
