Naghatag sang reaksyon ang China sa ginpagguwan nga pahayag ni President Ferdinand Marcos Jr. nga posible nga ma-involve ang Pilipinas sa tunga sang giyera kun magluntad ang full-scale war sa tunga sang Estados Unidos kag China bangud sang tensyon sa Taiwan.
Sa isa ka statement, ginpahayag ni Chinese Foreign Ministry spokesperson Guo Jiakun nga ang Taiwan isa ka “inalienable part” ukon indi mabakod nga kabahin sang teritoryo sang China. Gindugang pa niya nga ang isyu sa Taiwan “internal affair” sang China kag wala sang lugar ang Pilipinas ukon bisan sin-o nga pungsod nga mag-intra.
Ginklaro liwat sang China nga padayon nila nga ginakabig ang Taiwan nga kabahin sang ila teritoryo kag nagpaandam nga magagamit sila sang puwersa agud nga mabalik ini sa idalom sang ila kontrol.
Matandaan nga sa isa ka interview kay Marcos sa sidelines sang iya lima ka adlaw nga state visit sa India, ginpahayag niya nga indi malikawan nga indi ma-involve ang Pilipinas angut sa nasambit nga topiko agud proteheran ang pungsod kag ang mga Pinoy nga nagaistar sa Taiwan.
