𝗠𝗔𝗡𝗜𝗟𝗔 —Ginpanginwala sang China nga sila ang isa ka “threat” sa Pilipinas kasunod sang pahayag ni Senadora Imee Marcos nga may plano ang Beijing nga gamiton ang mga hypersonic missile batok sa mga military installation sa Pilipinas.
Suno kay China Foreign Ministry spokesperson Mao Ning, indi sini masigurado kon diin naghalin ang impormasyon sang Pilipinas, apang makasiling siya nga ang Tsina ang nagapabilin nga ginasuportahan ang peaceful development kag national defense policy kag wala nagatuga sang pagpamahog sa mga nasyon.
Una naman nga ginpahayag ni Senator Marcos nga nagakabalaka ini sa mga alegasyon sang mga hypersonic missile nga gina-target ang 25 ka mga lugar lakip ang mga military installation sa idalum sang Enhanced Defense Cooperation Agreement (EDCA) sa tunga sang Pilipinas kag Estados Unidos.
Apang, wala ginklaro sang utod ni Presidente Ferdinand Marcos, Jr. kun sa diin niya ginkuha ang impormasyon kag ginpahayag lamang sini nga nakita niya sa isa ka report nga suno sa iya “reliable”.
Samtang, wala naman ginhatagan sang madalum nga igtalupangod sang National Security Council (NSC) sang Pilipinas kag Department of National Defense (DND) ang claim sang senador.
Apang, nagpaandam ang China nga sila ang magahulag kon may mag-angkon sang ila ginakabig nga mga teritoryo.
Dugang pa ni Mao Ning, indi sila magpabilin nga nagapungko lamang samtang ginabastos ang ila matuod nga katungdanan kag interes kun ang kalinong kag katawhay ang ginabayolar sang iban nga nasyon.
Nahibaluan nga padayon nga nagadaku ang tensyon sa West Philippine Sea kasunod sang pagpang-atake sang Chinese Coast Guard (CCG) batok sa mga Philippine serviceman.
Suno naman sa Department of Foreign Affairs (DFA), kasunod sang bilateral nga pagsinapol sang Pilipinas kag China sa Manila, nagalaum ang ahensya nga mapahagan-hagan sini ang tensyon sa West Philippine Sea.
