Napuno sang verbal attack batok sa China kag Russia ang joint statement nga ginpaguwa sang Japan kag Estados Unidos sang Amerika kasunod sang ila nga high-level discussions.
Ini ang gintambungan nanday US Secretary of State Antony Blinken, Defense Secretary Lloyd Austin, kag ila nga Japanese counterparts.
Sa ila nga statement, ginsiling nga ang foreign policy sang China ang ginbalay para nga bag-uhon ang international order kag ginplastar lamang para sa ila kaugalingon nga benepisyo.
Ginsulit man sang US kag Japan ang ila pagpamatok sa iligal nga maritime claims sang China, militarisasyon sa reclaimed features, kag pagpamahog sa South China Sea.
Ginplastar man sa statement ang mga aktwasyon sang China kaangay sang pagpang-harass sa kadagatan amo man ang delikado nga paggamit sang Coast Guard kag maritime militia vessels.
Nagpabutyag man sang kahangawa ang duha ka nasyon sa pagpasangkad sang China sang ila nga nuclear weapons arsenal.
Gin-highlight sa statement ang nagasangkad pa kag provocative nga strategic military cooperation sang Russia sa China paagi sa joint operations kag drills sa vicinity sang Japan.
Namunuhan man pati ang suporta sang China sa defense industrial base sang Russia.
Sunod man nga ginkondenar sang Tokyo kag Washington ang nagadalom nga relasyon sang Moscow kag Pyongyang lakip na ang pag-procure sang Russians sang ballistic missiles halin sa North Korea nga isa ka maathag nga paglapas sa UN Security Council resolutions.
Ginkumpirma man sa statement nga nagaplano ang US nga mag-establisar sang bag-o nga Joint Force Headquarters sa Japan nga pangunahan sang three-star US commander kag paga-updan sang 54,000 military personnel.
