Nagpaguwa na sang statement ang Beijing nga nagakumpirma nga nagapatigayon ini sang joint military drills kaupod sa Russia sa southern coast sang China.
Suno sa defense ministry sang amo nga pungsod, ginsuguran ang military exercises nga ginatawag “Joint Sea 2024” sang temprano nga bahin sang Hulyo kag magalawig tubtub sa tunga-tunga subong nga bulan.
Suno sa ministry, ang drills sa kadagatan kag airspace sa palibot sang Zhanjiang, isa ka syudad sa southern Guangdong province, ang nagatuyo nga mag-demonstrar sa ila katuyuan kag kapasidad nga sabton ang ila mabaton nga maritime security threats.
Ginpahayag man sang Beijing nga tikang nila ini agud nga mapabilin ang global kag regional peace kag stability.
Dugang pa sang ministry, ini nga drills ang magapadalom pa sang comprehensive strategic partnership sang Beijing kag Moscow. Gindugang man nga nakasandig ini nga exercises sa tuigan nga plano sang duha ka pungsod para sa military engagement.
Ini nga anunsyo sang China ang natabo kadungan man sang pagtipon sang mga lider sang North Atlantic Treat Organization (NATO) sa Estados Unidos sang Amerika agud nga pabakuron pa ang suporta sa Ukraine nga gina-atake sang Russia halin pa sang Pebrero 2022.
Sa amo nga summit sa Washington D.C., ginpahayag sang NATO leaders nga nangin “decisive enabler” ang China sa invasion sang Moscow sa Ukraine — butang nga ginsabat naman sang Beijing paagi sa pagpaandam sa NATO nga indi magdabok sang anuman nga kumprontasyon.
